紐西蘭山遊記🇳🇿Tongariro Alpine Crossing （Winter)
路線：Tongariro Alpine Crossing (Winter)
距離：20.2 km（單程單日）
爬升： 1,196 metres (3,923 feet）
溫度： 8月份 約1至-5°C
官方預計時間 ：
夏季：6-8hrs（11月-4月）
冬季：8-9hrs（5月-10月）
店長實際 冬季 6hrs（5次小休，影下停下）
難度 - 店長主觀意見：☆☆☆☆☆☆⭐⭐⭐⭐
注意事項：沿途穿過數座山同活火山Mount Tongariro(圖5）、Mount Ngauruhoe（圖6）等，頂後下山路段較斜，上頂前有一小段小小小危險路段。冬季登山必須冰爪，冰斧optional，全程無乾淨水補及，雖有山水但唔肯定飲唔飲得。同埋記得睇天氣，大風時可達約9級風、火山爆發、落雪同雪崩等。
*要先跟DOC Department of Conservation 預約。
先簡單介紹一下TAC呢條Track背景，呢條track喺紐西蘭國家公園中最歷史悠久嘅Tongariro National Park入面。而呢個Park入面嘅山同大自然都被原居民Maori人視為一個神聖嘅地方。路線中會經過幾座仍然Active嘅火山、會見到熔岩冷卻後嘅地貌、火山持續噴緊嘅氣體同埋數個火山湖等地貌。其中佢更係《魔戎》入面末日火山嘅取景地方！
行程為 早上6時半由Ohakune的backpacker出發，開車約7時到達登山口附近的小鎮Whakapapa 的泊車位（Park and ride)再坐接送Van。由於登山口有泊車限制（4hours parking)，以免太多人泊山腳影響交通等原因，所以基本9成人都係要Book shuttle坐去登山口，行完落山後佢地再去終點接你。而今次我搵咗呢一間《tongarirocrossingshuttles》簡稱TCS（$60 NZD return)，亦係唯一一間冬季仲做Shuttle接送嘅公司。幸運地出發前一日有另一對Couple join，因為佢地要有最少3人先會出車。
7點多d從Park and ride（停車場）放低自已架車後出發，坐TCS嘅Van仔約半小時內到達登山口，在車上司機亦提醒到呢一條track嘅注意事項，例如天氣匯報，提醒我地唔好周圍去廁所（基本上每一兩個鐘就會有一個自然分解廁所），唔好行非官方路線（不破壞植物、LNT同respect the sacred mountain），以及交帶回程時間等。最後司機更提到當日朝早日出時嘅火燒天現象通常都唔係一個好嘅徵兆，出發前聽完都幾刺激。但當然出發前我有睇哂天氣風速火山資訊等，係難得嘅天晴，因為通常都大風多雲，行呢條Track前喺另一座山Taranaki認識到嘅當地人都分享話去咗3，4次都係壞天氣，Lucky me。
由登山口出發只有寥寥數人，除咗我車3人外，在我之後嘅一架車有一團8人登山團。如廁後正式出發，經過一個山谷，沿途有由火山 Ngauruhoe 爆發時嘅熔岩形成嘅地貌，而呢d熔岩叫『a’a』讀音為”Ah Ah”，應該係Maori文。再慢慢上爬，路經小步道，經過一條小橋後再爬，途中亦有不少警示及牌，提到之前爆發時嘅歷史，對上一次大爆發係喺1977年，爆發時噴射物如石頭等嘅平均速度為80km/h，更有少量達到700km/h cls。一直沿Ngauruhoe and Tongariro中間嘅山谷再上，附近已經開始積雪。到達咗一個好大嘅火山口平原(South Crater)地下都係結冰塊。行過平原後登頂前要再過Red Crater，亦開始聞得到硫磺，亦代表佢仲係一座活火山，行行下射d野落我到都唔出奇！在登頂前的Red Crater亦係要開始換上冰爪同埋冰斧嘅時候，因為開始斜，普通鞋基本上上唔到去。但整體上山頂嘅路都唔係好高難度要手腳並用嘅路，只有一小條約8米長嘅單邊懸崖要稍作注意。登頂後可以睇哂3座山，加幾個火山湖嘅景色。BTW去到紐西蘭雪山都見到d橙皮...再講唔好再以為d橙皮會一兩日就分解到，更唔好講就咁放喺d雪上面，take your shit back to the city。
登頂後下降200米，可見到” Emerald Lakes“翡翠湖，如其名，真係翠綠色的，附近亦有小洞不斷噴出嘅氣體。而落斜呢段路則係全程最斜嘅位，小心慢慢下降便可。途中會路過Emerald Lakes及其他火山湖，但都不可以游水或破壞自然環境！再次走過平原後會路過今個Track最大嘅湖 Blue Lake，由於我係冬季登山，大部分湖面已經結冰，我亦無帶到支Ultra Wide 鏡頭.. 如果有興趣行嘅朋友下次可以帶。基本上走過Blue lake後就係無限下山，大約2個半鐘如果係均速慢行。沿途都係正常山邊，森林風景，無乜太大要注意位置。最後去到終點Ketetahi Car Park，TCS嘅職員已經在車上等待，輕鬆番去Town完成今次嘅20km單日旅程。